Алматы әкімі Бақытжан Сағынтаев жұмыс сапары барысында өзен арналары, скверлер мен саябақтар, сонымен қатар маңызды сәулет құрылыстарының қоғамдық кеңістіктерін аралады.
Б. Сағынтаев Кіші Алматы мен Есентай өзендерінің су бөлу гидротехникалық құрылысын аралады. Мұнда Б. Сағынтаевтың тапсырмасы бойынша су деңгейін өлшеу үшін автоматтандырылған қондырғылар орнатып, цифрландырылған шаруашылық жүргізу қажет. Бұл су деңгейі туралы жедел ақпарат алып, сел қаупі төнген жағдайда шара қолданып, өзен арнасындағы суды бақылауда ұстап отыруға мүмкіндік береді. Одан бөлек, цифрландыру мәліметтер базасын құруға мүмкіндік береді, оның негізінде өзеннің маусымдық жағдайына талдау жүргізіледі. Осылайша, қала тұрғындарының сел қауіпсіздігі қамтамасыз етіледі.
Жұмыс сапары барысында мегаполис әкімі Есентай өзені арнасының Жамақаев көшесінен бастап ұзындығы 4,2 км болатын су қорғау жолағы мен су бөлуге дейінгі аралықты реконструкциялау жобасымен танысты. Мұнда арнаны кеңейту және тереңдету бойынша дайындық жұмыстары жүргізілген.
Нөсер жаңбыр салдарынан су деңгейінің көтерілуіне байланысты кейбір жерлерде габион құрылымдары құлаған. Осыған байланысты Б. Сағынтаев тіреу құрылымдарын монтаждаған орындаушыларды жауапкершілікке тартып, ең берік құрылыс материалдарын пайдалануды тапсырды.
Одан бөлек Б. Сағынтаев жаяу жүргінші жолы конструкциясын баспалдақсыз етіп өзгерту қажеттігіне назар аударды. Осылайша, төселген жолақта серуендеу, әсіресе арбада баласы бар аналар үшін ыңғайлы болмақ.
Жаяу жүргінші аймағына 350 сыртқы жарықтандыру тірегі, кіші сәулет формалары, қоқыс жәшіктері, балалар ойын алаңдары мен өтпелі көпір орнатылады.
Мегаполис әкімі Теренкурдағы жөндеу жұмыстарының сапасымен танысты. Оның айтуынша, осы жаяу жүргінші бағыты серуендеу аймақтарын құрудың үлгісі болу қажет.
Теренкурды абаттандыру Кіші Алматы өзені арнасы, су бөлуден бастап Достық даңғылынан Мақатаев көшесіндегі гидротехникалық құрылғыларды қамтиды. Жер телімінің ұзындығы — 8,9 км. Арнаны тазалау мен бекіту бойынша негізгі жұмыстар атқарылды. Енді іргелес аймақты абаттандыру жұмыстары жүргізіліп жатыр. Анықталған кемшіліктерден кейін мердігер өз есебінен асфальт төсеп, бордюрді ауыстырады. Енді 11 балалар мен спорт алаңын, орындықтар, қоқыс жәшіктері, модульді санитарлық қондырғылар, су ішуге болатын субұрқақтар орнату қалды. Одан бөлек өзенге Тәттімбет көшесінен Теренкурға түсетін, бес жаяу жүргінші көпірі жасалады.
Алматы әкімі Б. Сағынтаев жарықтандыру мен көше жиһазын таңдауда жайлылықты, практикалық, эстетиканы және ландшафттың қоршаған ортамен үйлесімділігіне мән беруді тапсырды. Дегенмен, орындық моделін ыңғайлылығына қарай қала тұрғындарының өздері анықтағаны маңызды.
Сонымен қатар Б. Сағынтаев Кіші Алматы өзенінің Достық даңғылынан төмен Гоголь көшесіне дейінгі аймақты жөндеу жұмыстарымен танысты.
Мегаполис әкімі «Дружба» скверін, сондай-ақ Тимирязев көшесіндегі құрылысқа немқұрайлы қараған мердігердің кесірінен пайдалануға берілу мерзімі созылып кеткен «Дружба» саябағын көгалдандыру мен абаттандыру жұмысының сапасын бағалады. Әкімнің тапсырысы бойынша барлық жұмыстар 15 мамырға дейін аяқталуы тиіс. Бұл ретте тиісті органдар мердігерге қатысты келісімшарт талаптарын бұзғаны үшін, әрі сапасыз құрылыс материалдарын пайдаланып, пайдалауға беру мерзімін кешіктіргені үшін де құқық қорғау органдары тексеріс жүргізеді. Одан бөлек, немқұрайлы қараған мердігерді қара тізімге енгізу де қарастырылады.
Б. Сағынтаевтың тапсырмасы бойынша Алматы қала құрылысын бақылау басқармасы қала кеңістіктерін ретке келтіру мерзімінің ұзарып, тұрғындардың ренішін туғызып, жұмысына немқұрайлы қарайтын мердігерлер тізімін жасады. Қазіргі уақытта толық тексеру жүргізіліп, заң бұзушылардың лицензиялары тартып алынып, олар туралы бар мәлімет қара тізімге енгізіліп жатыр.
Қала әкімі Б. Сағынтаев атап өткендей, қала өз міндетін адал, сапалы, әрі өзіне жүктелген міндетті мерзімінде атқаратын мердігерлерді қолдайды. Өйткені қала тұрғындардың жайлылығы ғана емес, жалпы қоғамдық көңіл-күй де осыған байланысты.
Жұмыс сапары барысында әкім Оқушылар сарайы маңындағы скверді абаттандыру жұмыстарымен танысты. Қала тұрғындарының қалауы мен сарапшылардың қорытындысы бойынша жобаға түзетулер енгізілген болатын. Сонымен қатар Б. Сағынтаев Әуезов театры маңындағы «Дружба» скверін, сонымен қатар «Дружба» саябағын абаттандыру мен көгалдандыру жұмыстарымен, Мүсірепов бульварын түрлендіру мен Қастеев мұражайы маңындағы субұрқақты қайта қалпына келтіру жобаларымен танысты.
Қала әкімі аталған объектілер құрылысында пайдаланылған гранит плиткалар мен бордюр тастарын қайта қолдануды тапсырды, өйткені олар бұзылмаған қалпы сақталып, әлі көп жыл қызмет етеді.
Оқушылар сарайы, Әуезов театры мен Қастеев атындағы мұражай маңындағы аймақтарға 10 жылдан астам жөндеу жұмыстары жүргізілмеген. Көптеген учаскелер, М. Әуезов театрының артқы жағындағы амфитеатр уақыт өте ыдырап кеткен. Жаяу жүргінші жолы, орындықтар жарамсыз күйге жеткен, жарық жоқ және субұрқақ жұмыс істемейді. Мысалға, Ә. Қастеев мұражайы маңындағы субұрқақ өткен ғасырдың 70-ші жылдары салынған, одан бері бір рет те жөндеуден өтпеген.
Жоба авторларымен талқылау барысында қала әкімі Оқушылар сарайы, М. Әуезов атындағы театр, Ә. Қастеев атындағы мұражай сияқты белгілі объектілерде автордың архитектуралық түпкі ойын сақтап қалу керектігіне назар аударды. Нәтижесінде, скверлерді абаттандыру мен жаяу жүргінші аймақтары жаңа тыныс алып, қала тұрғындарының тартылыс нүктесі болуы қажет. Бұл қаланың мәдениет объектілеріне баратындардың санын арттырады. Алматы әкімі Б. Сағынтаевтың тапсырмасы бойынша жобаларды түзетуде барлық қала тұрғындары үшін қоғамдық кеңістіктердің экологиялығына, тартымдылығына және қолжетімділігіне ерекше мән беріледі.
Ақпарат көзі: Алматы қаласы әкімдігінің қоғаммен байланыс қызметі
